मकवानपुर मालपोतले ६ महिनामा उठायो १६ करोड राजस्व - Lagani News

Post Top Ad

Wednesday, February 7, 2024

मकवानपुर मालपोतले ६ महिनामा उठायो १६ करोड राजस्व



हेटौँडा । मालपोत कार्यालय मकवानपुरले चालु आर्थिक वर्ष २०८०/८१ मा जग्गाको कारोबारबाट १५ करोड ७८ लाख ८० हजार छ सय ६२ राजस्व संकलन गरेको छ । मालपोत कार्यालयले साउनदेखि पुस मसान्तसम्मको अविधमा उक्त रकम संकलन गरेको हो ।


मालपोत कार्यालय मकवानपुरबाट थाहा नगरपालिका, इन्द्रसरोवर गाउँपालिका र कैलाश गाउँपालिकाको आग्रा र गोङ्टेबाहेकका अन्य स्थानीय तहको जग्गाको कारोबार हुँदै आएको छ । कार्यालयले चालु आर्थिक वर्षको साउन महिनामा रजिस्ट्रेसन दस्तुर, राप्ती संरक्षण कोष, न्यायिक दस्तुर रोक्का, सेवा शुल्क तथा अन्य प्रशासनिक दस्तुर, पुँजीगत लाभकर गरी  दुई करोड ६३ लाख सात हजार चार सय ९३ रुपैयाँ राजस्व संकलन गरेको छ ।


त्यसैगरी कार्यालयबाट प्राप्त जानकारीअनुसार सो अवधीमा साउन महिनामा रु तीन करोड, भदौ महिनामा  दुई करोड ४२ लाख ६० हजार चार सय १५ रुपैयाँ राजस्व सङ्कलन गरेको छ । त्यसैगरी कार्यालयले असोज महिनामा रु तीन करोड ९९ लाख ७२ हजार आठ सय ७८ राजस्व संकलन गरेको छ । 


यस्तै कात्तिकमा एक करोड ३४ लाख ५१ हजार सात सय ८६ रुपैयाँ र मङ्सिरमा दुई करोड ६५ लाख ७५ हजार चार सय ४९ रुपैयाँ राजस्व, पुस महिनामा दुई करोड ७८ लाख छ हजार ९१ रुपैयाँ राजस्व आम्दानी गरेको हो ।


गत आर्थिक वर्ष २०७९/८० को साउनदेखि पुससम्मको पहिलो छ महिनाको अवधिमा कार्यालयले २३ करोड ३६ लाख एक हजार छ सय ३६ रुपैयाँ आम्दानी गरेको थियो । कार्यालयले अघिल्लो आर्थिक वर्ष २०७८/७९ को पुस मसान्तसम्म रु २६ करोड ६० लाख ७२ हजार तीन सय ६९ राजस्व आम्दानी गरेको थियो ।


मालपोत कार्यालय राजस्व आम्दानीको एक स्रोत रहेको छ । यस कार्यालयले जग्गाको विभिन्न कारोबारबाट राजस्व आम्दानी गर्दै आएको छ । पछिल्लो समय कार्यालयमा कारोबार घट्दो क्रममा रहेको देखिएको छ । अघिल्लो आव २०७८÷७९ को तुलनामा गत आव २०७९/८० मा तीन करोड २४ लाख ७० हजार सात सय ३३ रुपैयाँ ले कम राजस्व आम्दानी भएको थियो । आव २०७८/७९ को तुलनामा चालु आवमा  १० करोड ८१ लाख ९१ हजार सात सय सात रुपैयाँले राजस्व कम संकलन भएको छ । पछिल्लो तीन वर्षको राजस्व सङ्कलनको तथ्याङ्क हेर्दा भारी गिरावट भएको देखिएको छ ।


कार्यालयका अनुसार गत आवको तुलनामा  चालु आवमा सात करोड ५० लाख रुपैयाँभन्दा कम राजस्व उठेको छ । चालु आवको केही समय जग्गाको कित्ताकाट बन्द, आर्थिक मन्दीका कारण जग्गाको कारोबार घटेसँगै राजस्व संकलनमा पनि कमी आएको हो । 


Pages